LECTURAS DE VERÁN 2

Carlo Lucarelli ten unha voz profunda, fala rápido e con frases curtas, lanzando un enigma en cada punto e aparte. Puiden miralo nun programa da TV italiana , Blue Notte, onde narra os casos delictivos que convulsionaron Italia nas últimas décadas. Móvese por un esceario en penumbra e ainda que o seu estilo é un tanto efectista, engancha dende o primeiro momento. Pero Lucarelli é, ademáis, un estupendo escritor de novela negra ( gialli, en italiano).



Almost Blue e Un giorno dopo l'altro comparten a presencia da comisaria Grazia Negro, una donna in un mondo di uomini. Tamén a música é un obsesivo leit motiv que percorre as súas páxinas e dá título a ámbalas dúas novelas: Almost blue na voz de Chet Baker e a canción Un giorno dopo l'altro que popularizou o malogrado cantante italián Tenco.
Os asasiños inquedan cos seus pensamentos, coa súa absoluta normalidade aparente, as súas obsesions e incluso os seus crípticos alcumes: La Iguana, un asasiño en serie, e Pitbull, un precoz criminal a soldo. Os dous utilizan Internet: para contactaren coas súas víctimas nun caso, e para recibiren ordes, no outro.

Lucarelli amosa unha Bologna escura e sórdida, alonxada da luminosidade padana, uns secundarios perfíados con agarimo (o cego Simone e a súa especial percepción do mundo, o xoven e sensible Alex ...) e un morboso e nada desdeñable erotismo.

O cóctel está preparado: sírvanse.